Saudi Arabia yafungua usajili wa Mahujaji wa Kigeni kwa ajili ya Hija 1445/2024
Kituo cha Mawasiliano ya Kimataifa (CIC), chini ya Wizara ya Vyombo vya Habari, kilitangaza Jumatatu kwamba Mahujaji kutoka kote ulimwenguni wanaweza kujiandikisha wenyewe na familia zao kwa Hajj 1445/2024 kupitia programu ya Nusuk Hajj, ambayo inasimamiwa na Wizara ya Hajj na Umrah.
Programu hiyo inaruhusu mahujaji kutoka Asia, Afrika, Ulaya, Amerika Kaskazini, Amerika Kusini na Oceania kuchagua kutoka kwa vifurushi mbalimbali vya Hija vinavyotolewa na watoa huduma walioidhinishwa, Gazeti la Saudi Gazette liliripoti.
Ili kujisajili, mahujaji wanahitaji kuunda akaunti ya kibinafsi kwenye programu kwa kutumia anwani zao za barua pepe yaani email na kuchagua nchi anayoishi sasa kutoka kwenye orodha ya nchi zinazostahiki Hija ya 2024. Maelezo zaidi kuhusu usajili yanaweza kupatikana kwenye tovuti hajj.nusuk.sa.
Hija ni moja ya nguzo za Uislamu na ni wajibu wa lazima wa kidini kwa kila Mwislamu mtu mzima mwenye uwezo. Inahusisha mfululizo wa mila na desturi zinazofanywa ndani na karibu na Mecca, jiji takatifu zaidi katika Uislamu.
Hija ya 2023 ilikuwa hija ya kwanza yenye uwezo kamili tangu kuzuka kwa janga la COVID-19. Kwa mujibu wa takwimu rasmi, mahujaji 1,845,045 wakiwemo wageni 1,660,915 na wenyeji 184,130 walishiriki katika ibada hiyo.
Takwimu pia zilionyesha kuwa mahujaji 969,694 walikuwa wanaume na 875,351 walikuwa wanawake. Wengi wa mahujaji, 1,056,317, walitoka nchi za Asia, walichukua asilimia 63.5 ya jumla. Idadi ya mahujaji kutoka nchi za Kiarabu ilikuwa 346,214, ikiwa ni asilimia 21 ya jumla.
3486563
