Tafsiri ya kwanza ya kitaalamu ya Qur’ani Tukufu kwa Kibulgaria

TEHRAN (IQNA) – Tafsiri ya kwanza ya kitaaluma ya Kurani Tukufu katika lugha ya Kibulgaria ilitolewa na Tsvetan Teophanov, maprofesa wa Chuo Kikuu cha Sofia. Teophanov alijifunza lugha ya Kiarabu kwa bahati na hii ilisababisha maendeleo makubwa katika maisha yake.

Alizaliwa huko Sofia, mji mkuu wa Bulgaria, mwaka wa 1952. Alipokuwa kijana mwanafunzi, aliona kitabu cha Kiarabu kwenye duka la vitabu. Alivutiwa na maneno na herufi za Kiarabu na akapendezwa kujifunza lugha hiyo.

Mnamo 1972, akiwa na umri wa miaka 20, alienda Iraq kusoma Kiarabu katika Chuo Kikuu cha Baghdad.

Baada ya kurudi nchini mwake, alikua profesa katika Chuo Kikuu cha Sofia, akifundisha fasihi ya Kiarabu ya zamani na ya kisasa, falsafa na ustaarabu wa ulimwengu wa Kiarabu.

Pia alitafsiri kazi mbalimbali kutoka Kiarabu hadi Kibulgaria.

Teophanov baadaye alipata PhD yake kutoka Taasisi ya Mafunzo ya Mashariki ya Chuo cha Russia huko Moscow na mnamo 1992 akawa mkurugenzi wa Kituo cha Chuo Kikuu cha Sofia cha Tamaduni na Lugha za Mashariki.

Mnamo 1992, alipokuwa akitafsiri Qur’ani Tukufu kwa Kibulgaria, alisilimu na katika mwaka huo huo akawa mkuu wa Idara ya Kiislamu ya Sofia. Hivi sasa yeye ni mwanachama wa Jumuiya ya Wataalam wa Mashariki ya Amerika na Jumuiya ya Uingereza ya Mafunzo ya Mashariki ya Kati.

Teophanov alialikwa na shirika la uchapishaji nchini Bulgaria kutafsiri Qur’ani Tukufu wakati ambapo ukomunisti ulitawala nchi na shughuli za kidini za Waislamu zilizuiwa. Chama cha Kikomunisti cha Bulgaria, hata hivyo, kilikuwa kimefafanua tafsiri ya Qur’ani kama kazi ya kilugha na si ya kidini.

Alianza kutafsiri mwaka 1987 na ilimchukua miaka mitatu kuikamilisha lakini aliifanyia marekebisho tafsiri au tarjuma hiyo tena na miaka kumi baadaye aliwasilisha tafsiri ya Kibulgaria ya maana ya Quran.

Alikumbana na matatizo mbalimbali wakati wa kutafsiri, ikiwa ni pamoja na ugumu wa kupata visawe vya baadhi ya maneno, vishazi, majina na istilahi ambazo zingewasilisha maana ipasavyo.

Kazi yake haikuwa tafsiri ya kwanza ya Qur’ani Tukufu kwa Kibulgaria kwani tafsiri moja ilichapishwa huko Bulgaria mnamo 1944 kabla ya Wakomunisti kushika madaraka nchini humo. Kazi hiyo ilikuwa imetafsiriwa si kutoka kwa Kiarabu bali kutoka kwa Kiingereza na ilikuwa na makosa.

Katika kazi yake, Teophanov alizingatia tafsiri za Kurani katika Kiingereza, Kirusi, Kifaransa na Kijerumani na akajaribu kutoa tafsiri inayoleta maana karibu na zile za Kitabu Kitakatifu.

Kazi yake ni tafsiri ya kwanza ya kitaaluma ya Qur’ani Tukufu kwa Kibulgaria na ndiyo pekee iliyoidhinishwa na Dar al-Ifta ya Waislamu wa Bulgaria.