Viongozi wa Uturuki, Malaysia: Kuvunjiwa heshima Qur'ani Tukufu ni tishio kwa amani
Rais wa Uturuki Recep Tayyip Erdogan na Waziri Mkuu wa Malaysia Anwar Ibrahim wamelaani vikali uchomaji moto wa hivi karibuni wa Qur'an Tukufu na mijadala ya watu wengi ambayo inachochea matamshi ya chuki dhidi ya Uislamu.
Katika taarifa ya pamoja iliyotolewa Jumatano baada ya mkutano wa viongozi hao mjini New York, pembizoni mwa Mkutano wa 78 wa Baraza Kuu la Umoja wa Mataifa, pia wameeleza wasiwasi wao juu ya kuibuka kwa "aina mpya ya ubaguzi wa rangi" yenye sifa ya chuki dhidi ya wageni na kueneza dhana potofu kuhusu Waislamu.
Viongozi hao wamelaani “kwa maneno makali matukio ya hivi karibuni ya kuchomwa moto nakala za Qur’ani Tukufu yaliyoshuhudiwa katika nchi kadhaa za Ulaya chini ya kivuli cha uhuru wa kujieleza pamoja na mijadala ya watu wengi inayochochea matusi, matamshi ya chuki na uchokozi dhidi ya Uislamu na Waislamu, " ilisema taarifa hiyo.
Erdogan na Ibrahim pia walionyesha "wasiwasi mkubwa" kuhusu "mwenendo wa kuongezeka chuki, kutovumiliana, ubaguzi na vitendo vya ukatili dhidi ya Waislamu na utakatifu wao ambao umefikia kiwango cha kutisha katika sehemu nyingi za dunia, hasa Ulaya."
Viongozi hao walisema wanakaribisha kupitishwa kwa Azimio la Baraza Kuu nambari 76/254 la kutangaza Machi 15 kuwa "Siku ya Kimataifa ya Kupambana na chuki dhidi ya Uislamu" pamoja na mjadala wa dharura wakati wa kikao cha 53 cha Baraza la Haki za Kibinadamu la Umoja wa Mataifa kujadili "ongezeko la kutisha." "katika vitendo vilivyopangwa na hadharani vya chuki za kidini kama inavyodhihirika kwa kudhalilishwa mara kwa mara kwa Quran Tukufu na kupitishwa kwa azimio la Baraza la Haki za Kibinadamu la Umoja wa Mataifa linalofafanua uchomaji wa vitabu vitakatifu kuwa ni chuki ya kidini.
Viongozi hao pia walikaribisha Azimio la Baraza Kuu nambari 77/318 kuhusu Kukuza Mazungumzo ya Kidini na Kitamaduni baina ya Dini na Uvumilivu katika Kupinga Matamshi ya Chuki lililopitishwa tarehe 25 Julai.
Kwa mujibu wa taarifa hiyo, Erdogan na Ibrahim pia walisisitiza kwamba vitendo vya chuki za kidini, ubaguzi wa rangi, ubaguzi na chuki dhidi ya wageni vinatishia amani na kuchochea utamaduni wa vurugu.
Viongozi hao pia wametoa wito kwa wadau wote husika zikiwemo serikali kuongeza juhudi za kukabiliana na ubaguzi, chuki dhidi ya wageni, ubaguzi wa rangi na matamshi ya chuki kwa kuzingatia haki za binadamu kimataifa.
3485255
